113. Invisible Dude / ඉන්විසිබල් ඩූඩ්.

අද වැඩට ඇවිත්, ඇඟිල්ල තියලා පඩිපෙල දිගේ ස්ටාෆ් රූම් එකට යනකොටයි මතක් වුනේ ටයි එක දාන්න අමතක වෙලා කියලා. ටයි එක නැතුව වැඩ කරන එක වරදක් වුනත්, අද විභාග නිසා මේක නෝට් නොවෙන්න ඉඩ තියෙනවා කියලා මට හිතුනා. 

 ඒ ඔක්කොමත් හරි ඊයේ රෑ කොණ්ඩේ පොඩ්ඩක් ට්‍රිම් කරන්න ගිහින් දකුණු පැත්තේ ඇහිබැම කැපිලා ගියානේ, චිරිස් ගාලා. යකෝ මටත් වෙන දේවල් අම්මපා. ඒ ගමන ඩැමේජ් කන්ට්‍රෝල් එකක් හැටියට,  ඒ පැත්ත එක ගානට හිටින්න කොටට ට්‍රිම් කලත් ඇහිබැමේ වාටිය ඉතුරු වෙන්න මැද්ද ගෑවිලා ගිය එකට නම් හදන්න බෑ. මම කලේ ට්‍රිමර් එක අරගෙන අනිත් පැත්තත් කොට කරපු එකයි. ඒත් අර අගේට දළඹුවෙක් වගේ තිබ්බ ඇහිබැම ආපහු තිබුණ ගානට එන්න සෑහෙන කාලයක් යයි. 


අයි බ්‍රව් පෙන්සිල් එකක් තිබ්බ නම් හරි. ඒත් කඩේට ගිහින් එක ඇහිබැමක් නැතුව අයිබ්‍රව් පෙන්සිල් එකක් ඉල්ලන්න ගියාම කඩේ එකා මූණ දිහා බලලා දාන කිච හිනාව මතක් වුනාම, ඒකත් අල්ලලා දැම්ම. ඒ මදිවට රෑ එකොලහට කඩ වහනවා. 

උදේම නැගිටලා, සපත්තු පොලිෂ් ටින් එක වත් අරගෙන ටිකක් ටචප් එකක් දානවද කියලා හිතලා ඒක හොයන්න ගියාමයි දැක්කේ අර ලික්විඩ් ෂූ පොලිෂ් එක. කොටන් බඩ් එකක් පාවිච්චි කරලා මේකෙන් ටිකක් මිරිකලා පොඟවාගෙන ඇහිබැම ආපහු ඇඳ ගත්තා. 

දැන් ඉස්කෝලේ අරින්නත් ලඟයි. ඇයිබැමයි, ටයි එකයි නැතුව දවස ගෙවාගත්ත එක ගැන දැන් මට තියෙන්නේ ජයග්‍රාහී හැඟීමක් කියලා උඹලා හිතනවානම් ඒ උඹලට වැරදිලා. 

 දැන් තියෙන්නේ ඊට වඩා වඩා හාත්පසින්ම වෙනස් අදහසක්. ඒක එක්තරා ඉච්ඡා භංගත්වයක්වගේ එකක්. තව විදියකින් කිව්වොත් කිසිම කෙනෙක් මගෙන් මේ ගැන ඇහුවේ නෑ. කොටින්ම දීපාවත් මේක නෝට් කලේ නෑ. ඒ ගැන කිව්වොත් මම අවුරුදු දහයක් - විස්සක් කරේ දාගෙන හිටපු චේන් එකදැන් දාගෙන හිටියා ඇති කියලා හිතිලා පෙබරවාරි මාසේ ගලවලා හැංගුවා. ගෙදරට ෂර්ට් එක නැතුව ඉන්න මගේ කරේ චේන් එක නැති බව තවම ගෙදර කිසිකෙනෙක් දැක්කේ නෑ කිව්වාම! යකෝ මං ඉන්විසිබල් වෙලාද?