58. ක්ලීන් ස්වීප් ඉග්නේෂස් Clean Sweep Ignatius: Part 1

නයිජීරියාවේ මුදල් ඇමති ධූරයට ඉග්නේෂස් අගාර්බි පත්වීමේ පුවත ගැන උනන්දුවක් දැක්වූවේ අතලොස්සක් දෙනා පමණි. නිර්දය විවේචකයෝ කී ලෙසම පසුගිය වසර දාහතක කාලයක් තුල පත්වූ දාහත් වැනි මුදල් ඇමති ඉග්නේෂස් වූ විට එය අරුමයක්ද?
සිය මුල්ම පාර්ලිමේන්තු ප්‍රතිපත්ති ප්‍රකාශයේදී, රාජ්‍ය අංශයේ ඔඩුදුවා තිබූ දූෂණ, අල්ලස් හා අක්‍රමිකතා මුලුනුපුටා දැමීමට පොරොන්දුවකුත්,  දූෂිත නිලධාරීනට අනතුරු හැඟවීමකුත් කල ඉග්නේෂස්, කතාව නිමකලේ, තමන් නයිජීරියාවට "ෆුල් සුද්දයක්" දෙන්න අදහස් කරන බව පවසමිනුයි.

පසුගිය මුදල් අමාත්‍යවරුන් දහසය දෙනාගේම කතා අසා වෙහෙසට පත්ව සිටි ජනතාවට අලුත් යමක් මෙම කතාවේ නොමැති බව ප්‍රධාන කතෘ තීරණය කල බැවින්දෝ, 'ලාගෝස් ඩේලි මේල්' පුවත්පතේ මේ ගැන සඳහනක් වත් නොවීමෙන්ම කතාව ඇති කල බලපෑම සිතාගත හැකිය.

කෙසේ හෝ මෙම ඇල්මැරුණු ප්‍රතිචාරවලින් කෙසේවත් නොසැලුනු ඉග්නේෂස්, මහත්වූ උද්‍යෝගයෙන්, ධෛර්යයෙන් හා අධිෂ්ඨානයෙන් තම ධූරයේ වැඩ ඇරඹීය.

පත්වීමෙන් දින කීපයකට පසු, ධාන්‍ය ආනයන ගණුදෙනුවක් සඳහා ව්‍යාජ ලේඛණ සකස් කර කො‍ටුවූ අමාත්‍යාංශයේ සුළු නිලධාරියෙකු දඟගෙයි ලෑමට හේ සමත් විය.

ඉන් අනතුරුව ඉග්නේෂස්ගේ අලුත් කොස්සේ කෙඳිවලට හසු වූයේ, විනිමය නීති උල්ලංඝණය කිරීමේ චෝදනාවට ලක්වූ ලෙබනන් ජාතික ආයෝජකයෙකි. ඔහුව රටින් නෙරපා දමනු ලැබුවේ අධිකරණ ක්‍රියාමාර්ගයකින් පවා තොරවය.

හරියටම ඉන් මසකට පසුව, ‍රැකියාවට අදාල වරප්‍රසාදයක් ලෙස ලාගෝස් වැසියන් පවා විශ්වාස කල අල්ලස් ගැනීමේ චෝදනාවට පොලිස්පතිවරයා  අත් අඩංගුවට ගැනීමට හැකිවීම,  ඉග්නේෂස් පවා සැලකුවේ  තමා ලද පෞද්ගලික ජයග්‍රහනයක් ලෙසය.

ඉන් සිව් මසක් ඇවෑමෙන් පොලිස්පති වරයාට දහ අට මසක සිර දඬුවමක් නියමවීමෙන් අනතුරුව මුල් වරට ඉග්නේෂස් 'ලාගෝස් ඩේලි ටයිම්ස්' පුවත්පතේ මුල් පි‍ටුව ආක්‍රමණය කලේය. එම පුවත්පතේම මැද පි‍ටුවේ එක් නායකයක් ඉග්නේෂස්ව හඳුන්වා තිබුනේ වංචනිකයන් බිය විය යුතු, 'යසට අතුගෑවෙන අලුත් කොස්සක්' හෙවත් 'Clean Sweep Ignatius' යනුවෙනුයි.

 ඉන්පසු සිදුවූ අත් අඩංගුවට පත්වීම සිදුවූ වැලෙන් අනතුරුව, රාජ්‍ය නායකයා වූ ජෙනරල් ඔටෝබි පවා, ඔහුගේම මුදල් ඇමතිවරයාගේ දැඩි සුපරික්ෂාවට ලක්වෙන බවට දූෂමාණ ආරංචි පැතිරිනි. මෙහි ප්‍රතිඵලය වූයේ ඉග්නේෂස්ගේ 'මිස්ටර් ක්ලීන්' ප්‍රතිරූපය තව දුරටත් වර්ධනය වීමයි.

වටිනාකම ඩොලර් මිලියන සියය ඉක්මවන සියලුම විදෙස් කොන්ත්‍රාත් පෞද්ගලිකව තියුණු විෂ්ලේෂණයට ලක්කර අනුමත කිරීම ඉග්නේෂස් සියතට ගත්තේය. ඔහු මෙහිදී ගත් හැම තීරණයක්ම සතුරන්ගේ තීක්ෂණ විමසුමට බඳුන් වුවත්, කිසිම දූෂණයකට ඉග්නේෂස්ගේ නම පටලැවීමට කිසිවෙකු අපොහොසත් විය.

ඉග්නේෂස් මුදල් ඇමති ලෙස දෙවන වසරේ වැඩ ඇරඹි කල 'දෙඤ්ඤං-බැටේ-විචාරකයන්' පවා ඔහු ගැන සුභවාදී ප්‍රකාශ කිරීමට පටන් ගත් අතර ජෙනරල් ඔටෝබි හදිසි හමුවක් සඳහා ඉග්නේෂස්ට කැඳවීමට තරම් විශ්වාසය පල කලේය.

ඩෝඩන් හමුදා බැ‍රැක්කයේ පිහිටි රාජය නායක නිළ නිවස්නයට මුදල් ඇමතිව සාදරයෙන් පිළිගත් ජෙනරල් ඔටෝබි, සිය කාර්යාල කාමරයට කැඳවාගෙන යන ලදුව, පහල යුධ අභ්‍යාස භූමිය හොඳින් දර්ශණය වන විශාල කවුලුවක් අසල ස්ථානගත කර තිබූ සැප පු‍ටුවක ඉග්නේෂස්ට අසුන් පැනවීය.

"ඉග්නේෂස්, මම ඔහේගෙ අලුත්ම අයවැය වාර්තාව කියවලා ඉවර වුනා විතරයි. තවමත්  විදේශ සමාගම් විසින් අතරමැදියන්ට පගාව දීමෙන්  විතරක් දේශීය ආදායම් දෙපාර්තමේන්තුව  අවුරුදු පතා ඩොලර් මිලියන ගනනක් පාඩු විඳින බවට ඔහේ කරලා තිබ්බ ප්‍රකාශය කියවලා මට යකා නැගලා ඉන්නෙ. මේ සල්ලි මොකාගෙ සාක්කුවකට වැටෙන්නෙ කියලා අදහසක් හෙම තියෙනවද ඔහේට? මට අන්න ඒකයි දැනගන්න ඕනෙ."

අසුනේ සෘජුව හිඳගත් ඉග්නේෂස් රාජ්‍ය නායකයාගේ මුහුණ දෙස එක එල්ලේ බැලීය.

"එයින් සෑහෙන ප්‍රමාණයක් පෞද්ගලික ස්විස් බැංකු ගිණුම් වලට බැර වෙන බවට නම් මට සැකයක් තියෙනවා. නමුත් ඒක ඔප්පු කරන්න අවශ්‍ය සාක්ෂි දැනට මා ලඟ නෑ"

"එහෙමනම් ඒ සාක්ෂි ලබා ගන්න අවශ්‍ය ඕනෙම ක්‍රියාමාර්ගයක් ගන්න අමතර බලතල මම ඔහේට පවරනවා," ජෙනරල් ඔටෝබි කීය. "මේ තක්කඩි ටික කො‍ටුකර ගන්න අවශ්‍යයි කියලා ඔහේට හිතෙන ඕනෑම ක්‍රමවේදයක් භාවිතා කලාට වරදක් නෑ. මේ  වැඩේට අත ගහන කොට,  කිසි කෙනෙකුගෙ තරාතිරමට, බලපුලුවන්කාරකම් වලට බය වෙන්නවත් බුරුලක් දෙන්නවත් අවශ්‍ය නෑ."

"මේ වගේ භාරදූර වැඩකට අත ගහන්න නම් මට ඔබතුමාගේ අත්සන යොදලා බලය පවරපු ලිපියක් අවශ්‍ය කරනවා, ජෙනරල් තුමනි."

"එහෙන්ම නම් අද හවස හය වෙනකොට ඒ ලිපිය ඔහේගේ මේසෙ උඩ තියෙවි." රාජය නායකයා කීය.

"ඒ වගේම, මට විදේශගත වෙද්දි, පූර්ණ බලතල සහිත තානාපති වරප්‍රසාද ලැබෙනවානම් තමයි ලේසි."

"කිසි ප්‍රශ්ණයක් නෑ."

"එහෙනම් ස්තුතියි, ජෙනරල් තුමනි," හමුව අවසන් බව වටහාගත් ඉග්නේෂස් හුනස්නෙන් නැගිටිමින් පැවසීය.

"මේකත් අවශ්‍ය වේවි ඔහේට," දෙදෙනාම කුටියේ දොර වෙත ගමන් කරද්දී ජෙනරාල්වරයා පැවසීය. ඇහි බැම ඔසවා ජෙනරල් දෙස බැලූ ඉග්නේෂස්, ජෙනරල්වරයා අත්ල මත තබාගෙන තමන්ට පෑ කුඩා ස්වයංක්‍රීය පිස්තෝලය දු‍ටුවේය. "...මොකද, මට සාධාරණ සැකයක් තියෙනවා ඔහේටත් මට තරම්ම සතුරන් සංඛ්‍යාවක්  මේ වෙනකොට ඇතිය කියලා."

නුහුරු බවක් පාමින් පිස්තෝලය අතටගත් ඉග්නේෂස් එක කබා සාක්කුව තුල රුවාගනිමින් පහත් හඬින් ස්තුති කලේය. නිහඬ සමු ගැනීමකින් අනතුරුව, ඉග්නේෂස් ‍රැගත් රිය අමාත්‍යාංශය බලා පිටත් විය.

නයිජීරියානු මහ බැංකුවේ අධිපතිගේ අනුදැනුමකින් හෝ වෙනත් ජ්‍යේෂ්ඨ සිවිල් නිලධාරීන්ගේ බලපෑමකින් තොරව, ඉග්නේෂස් සිය නව වැඩ පිලිවෙල ඇරඹුවේ ඉමහත් කැපවීමෙන් හා උනන්දුවෙනි. ‍රැය නිදි වරාගෙන ඔහු කල විමර්ශණ කටයුතු වල ප්‍රතිඵල හේ රහසක්ව තබාගත්තේය. තුන් මසක් ඇවෑමෙන් ඔහු දඩයම පටන් ගත්තේය.

හදිසි විදේශ සංචාරයක් සඳහා බොහෝ නයිජීරියානුවන් නිවාඩු සඳහා රටින් පිටවන  අගෝස්තුවම ‍තෝරාගැනීමට ඉග්නේෂස් සැලසුම් කලේ කිසිවකුගේ සැකයට බඳුන් නොවීම සඳහාය.

සිය පෞද්ගලික ලේකම් ඇමතූ ඉග්නේෂස්, තමාටත්, බිරිඳටත්, දරු දෙදෙනාටත්, ෆ්ලොරිඩාවේ ඕර්ලැන්ඩෝ වෙත ගුවන් ටිකට් පත් මිලදීගන්නා ලෙසත්,  සම්පූර්ණ වියදම තමාගේ පෞද්ගලික ගිණුමින් හර කරන ලෙසත්  අණ දුන්නේය.

ෆ්ලොරිඩාවට ලඟාවූ නයිජීරියානු ඇමති පවුල මැරියට් හෝටලයේ නවාතැන් ගත්හ. කිසිම පූර්ව දැනුම් දීමකින්  තොරව  සිය බිරිඳ ඇමතූ ඉග්නේෂස්, තමා හදිසි රාජකාරි කටයුත්තක් සඳහා දින කීපයකට නිව් යෝක් බලා පිටත් වන බවත්, නිවාඩුවේ ඉතිරි දිනයන් පවුල සමඟ ගත කිරීමට ඒ නිමවා පැමිණෙන බවත් දැනුම් දුන්නේ ගහෙන් ගෙඩි එන්නාක් මෙනි.

සිය පවුල ඩිස්නිලන්තයේ  විනෝද වීමට කටයුතු පිළියෙල කල ඉග්නේෂස් පසුදා උදෑසනම නිව් යෝක් බලා පියාසර කලේය. ලා ගාර්ඩියා ගුවන් තොටේ සිට කෙනඩි ගුවන් තොට දක්වා දුර  ටැක්සියකින් ගමන් ගත් හෙතෙම, විවේක කාමරයට වැදී ඇඳුම් මාරු කරගත්තේය. ඉන් අනතුරුව ගාස්තුව මුදලින් ගෙවා ජිනීවා දක්වා යාමට හා ඒමට සංචාරක පන්තියේ ටිකට් පතක් වෙන කරගත් ඔහු, කිසිවෙකුගේ අවධානයට ලක් නොවීම ස්විස් එයාර් යානයට ගොඩවිය.

෴ *මතු සම්බන්ධයි* ෴

 සමහරුන් ආඩම්බර කාර උද්ධච්චයකු ලෙස හඳුන්වනු මා අසා තිබුනත්, බ්‍රිතාන්‍ය ලේඛක Jeffrey Archer මගේ ප්‍රියතම ලේඛකයෙකි. ඔහුගේ කෙටිකතාවල ඇත්තේ වේගයෙන් ගලායන ගතියකි. එමෙන්ම කෙටිකතාව කියවා අවසන් වූ වහාම එය තව අයෙකුට කියන තෙක් ඉස්පාසුවක් නැති ගතියද  මම ඔහුගේ කතා ප්‍රිය කරන තවත් හේතුවකි. සිර දඬුවම් පවා විඳ ඇති ජෙෆ්‍රි මනා ඇසූ පිරූ ඇත්තෙකු වීම  අරුමයක් සේ මට නොහැ‍ඟේ.